ENQUISA SOCIOLINGÜÍSTICA ALUMNADO 2023

Para realizar a enquisa só terás que premer AQUÍ e cubrila ata o final. Ao rematar, dámoslle a ENVIAR. Moitas grazas pola vosa participación e pola vosa honestidade e sinceridade nas respostas, é un documento moi útil para poder abordar a situación lingüística do IES e planificar estratexias de mellora.

Esta fin de semana... escoitamos a Guadi!

 Porque Guadi Galego sempre ten cancións que nos poñen o corazón quentiño. Esta fin de semana vén moi fría, así que precisamos rodearnos de caloriña. 

As persoas que vaiades ver a neve, gozade moito dela, das paisaxes tanto naturais coma das cidades, que pintan todo de branco coma nunha postal. Podedes animarvos a levar música en galego no traxecto, xa sabedes que agora é moito máis fácil co acceso a música dixital en plataformas.

As que non poidades ir ver a neve, quedade ao abriguiño, coa familia, cos amigos, cun bo libro, series e boa música... un plan xeitoso tamén!

Esperamos que vos guste esta canción de Guadi con Iván Ferreiro e a ver se alguén se anima a facer unha así de chula sobre Malpica.

AGASALLA GALEGO, AGASALLA EN GALEGO!!

Seguro que no Nadal tedes moitas persoas queridas ás que agasallar e ás veces fáltannos recursos e ideas. E para iso estamos nós, para recomendarvos lecturas, xogos, xoguetes, artesanía (á parte da local, que esa recomendámola SEMPRE, por activa e por pasiva) e mesmo cestas de produtos, que sempre se agradecen neste tempo, cursos que se poden facer desde a casa ou pequenas viaxiñas para coñecer Galicia aloxándose en sitios TOP.

Para outra volta, faremos recomendacións de roteiros e lugares que nos reciben e nos tratan en galego, que tamén é interesante.

Desexámosvos un feliz Nadal, un feliz descanso e que o 2023 nos traia tempo para a familia, saúde e momentos de tranquilidade.

Para o 25 de novembro recomendamos...

Xa veriades moitas campañas institucionais, algunhas delas afortunadas, outras bastante desafortunadas por poñer o foco na vítima e non en quen agrede, mais nós queremos sumar algo máis á concienciación social desta lacra que non ten fin.

Está claro que educar socialmente é algo que non se consegue do día para a noite, mais temos que sumar todos os esforzos por conseguir unha sociedade mellor en que poidan desenvolverse os nosos nenos e nenas, as nosas mozas e mozos, que teñen o dereito a viviren sen sentírense constrinxidos por roles estereotipados e, por suposto, sen recibir violencia. Educar nas relacións entre iguais, saudables e respectuosas non é fácil, pois o ambiente que os rodea non sempre é o máis propicio (o audiovisual, a música, as estéticas, a moda, a publicidade...) pero pensamos que paga moito a pena non desistir, non renderse.

Desta volta, á parte de sumármonos ás propostas lanzadas polo centro, que pretenden a visibilización deste problema, tamén ofrecemos unha alternativa en canto á música que están escoitando a diario. Neste caso, hai unha playlist que tamén recolle música con outras mensaxes que non reforzan estereotipos nin relacións violentas ou desiguais.

Podes escoitala AQUÍ se tes interese ou procurala no Spotify como 25 músicas galegas pró 25N

Ademais, o sábado 26 de novembro, o concello de Malpica programou dentro da súa XVIII Mostra de Teatro a peza Feminíssimas, de Ste Xeito Producións. Será no centro cívico ás 20.30 e a entrada é gratuíta. Animamos á asistencia e difundimos entre o noso alumnado esta actividade, que pode darnos para debater posteriormente, pois nela ofreceranse tres puntos de vista diferentes sobre o feminismo e sobre tantas e tantas cuestións que nos preocupan actualmente. 

Animamos a que as familias tamén acudan cos seus fillos e fillas e que dialoguen na casa, ao final, a implicación de todos e todas é fundamental. Saber o que pensan, como establecen as relacións cos e coas súas compañeiras...

Verémonos alí!

Magosto!!!!

O magosto é unha época que a todos nos encanta e este ano houbo moita animación: castañas, pan de ovo, música en directo, música en diferido, festa rachada!!!

Traballou arreo a ANPA, a dirección, extraescolares, profesorado colaborador e acompañáronnos varias mozas da asociación cultural Raigañas, da que tamén son membros activos algúns dos nosos alumnos e das nosas alumnas.

Ademais, un grupo que sabía que ía haber fotos presentouse no centro vestido ben elegante, bailadores coma eles non os había hoxe na redonda.

Se queredes escoitar a playlist que preparamos desde o EDL, podedes picar AQUÍ. 

Deixámosvos algunhas fotiñas da festa:

O porco de pé...

O Concello de Malpica, no seu mes do teatro trouxo o espectáculo de O porco de pé, unha das maxistrais obras da literatura galega e que está no currículo de 4ºESO. Así que, inda que era nunha sesión nocturna, uns cantos compañeiros achegáronse para gozar do espectáculo, que nos deixou abraiados. Magníficas interpretacións, fantástico de comezo a final, todo nos gustou: escenografía, adaptación, interpretación, actores, actriz, música...

Polo Samaín... microrrelatos en 5 palabras

Porque ás veces os discursos contundentes son os máis efectivos, e os que máis medo dan, por iso podemos encerralos en cadaleitos e agardar a que non saian máis de aí.