O luns día 20 teremos un obradoiro de regueifa con Lupe Gómez, financiado polo Concello de Malpica e de aí confiamos en sacar bos regueifeiros e boas regueifeiras para participar este curso, xunto con outros institutos da Costa da Morte na Liga de Regueifa.
Como o vedes, pensades que estades listos e listas para esas pelexas de galos elevadas ao máximo nivel?
 |
O Equipo de Dinamización da Lingua xa está en marcha e ten pensadas unhas cantas actividades para dinamizar a vida no centro, por suposto, en galego.
Que vos parece formar parte dese equipo que consegue que a vida diaria funcione na nosa lingua? Como vedes colaborar a facer campañas que afecten tamén a nosa contorna? Queredes axudar a que alumnos e alumnas que non teñen oportunidade de facer a súa vida diaria en galego conten con esa oportunidade?
Pois fala con Luz, que está organizando a xente e as reunións para poder trazar as estratexias mellores!
 |
Como cada 30 de xaneiro, tivo lugar no noso centro a conmemoración do Día Escolar da Non Violencia e a Paz.
No recreo, procedeuse á lectura dun manifesto redactado na materia de Oratoria polo alumnado de 3º ESO e cantouse a canción Color esperanza. Ademais, na entrada realizouse unha exposición coas pombas de papel que se realizaron nas titorías.
Parabéns a toda comunidade educativa polo traballo realizado!
O xoves 19 de decembro tivemos outra sesión do club de lectura co alumnado de 4º de PDC. Nesta ocasión intercambiamos opinións sobre Cobiza, de María Reimóndez. É unha novela de ciencia ficción feminista que se desenvolve nun futuro distópico despois da Gran Desconexión. A historia sitúase nun mundo dividido entre os Recunchos, zonas empobrecidas, e as Capitais, a cúpula do poder e da opulencia, só accesibles a través da "lotería da fertilidade". A trama segue a Luz, que habita neste presente fragmentado e deberá enfrontarse ao impacto dunha sociedade na que os corpos, as identidades e as orientacións sexuais son clasificados e sometidos a estruturas de poder opresivas.
A novela presenta unha reflexión profunda sobre o sexo, o xénero, a construción das identidades e as dinámicas de poder que marcan as nosas vidas. A través da historia de tres seres de materia vexetal creados con forma humana, que son capturados e vendidos como escravas, Reimóndez presenta unha mirada feminista e ecoloxista sobre un futuro no que as diferenzas sexuais e de xénero se xogan nun escenario de explotación e destrución ambiental.
Con Cobiza, a autora obtivo o I Premio Pinto e Maragota á diversidade sexual e de xénero, un recoñecemento á súa capacidade para ofrecer unha reflexión revolucionaria e de alta calidade literaria sobre as cuestións máis relevantes do noso tempo.
